Habari kamili kuhusu Soko lililoteketea moto Mwanza

Leo alfajiri Septemba 28,2018 Moto usiojulikana chanzo chake umeteketeza soko la Mlango Mmoja jijini Mwanza
Kamanda wa polisi mkoa wa Mwanza, Jonathan Shana amethibitisha kutokea kwa tukio hilo amesema mpaka inafikia saa mbili asubuhi walikuwa wamezima moto huo kwa asilimia 90.
Magari ya zimamoto na uokoaji yanaendelea kuuzima moto huo ambapo jitihada za kudhibiti moto huo unaoteketeza mabanda ya wafanyabiashara zaidi ya 1000 wa eneo hilo zinaendelea.
Mmoja kati ya wafanyabiashara wa soko hilo, Elias Wambura amesema huenda moto huo ukawa umesababishwa na mamalishe ambao wana tabia ya kuacha majiko yao yakiwa na moto kwa lengo la kuyakuta alfajiri na kuendelea na shughuli yao ya mapishi.
“Sina uhakika lakini kwa upande wa hao wa mama, wana tabia ya kufunika moto kwenye majiko ili wakija asubuhi, isiwape taabu kuuwasha,” amesema Wambura.
Mwenyekiti wa masoko jijini Mwanza, Hamad Nchora amewapongeza wafanyabiashara wa soko la Mlango Mmoja kwa ushirikiano walio nao.