Serikali imesema changamoto ya kukatika umeme mara kwa mara wanayoipata wananchi wa Korogwe inafanyiwa kazi na  itaisha ndani ya kipindi kisichozidi mwezi mmoja kuanzia sasa, hivyo wawe wenye subirá na waondoe hofu.

Waziri wa Nishati, Dkt. Medard Kalemani aliyasema hayo kwa nyakati tofauti jana, akiwa katika ziara ya kazi wilayani humo.

Akizungumza ofisini kwa Mkuu wa Wilaya ya Korogwe, Kissa Gwakisa na baadaye katika mikutano mbalimbali na wananchi, Waziri alibainisha kuwa, changamoto husika ilisababishwa na kuungua kwa transfoma yenye megawati 38 eneo la Mlandizi, ambayo ilikuwa ikisambaza umeme katika mikoa ya Dar es Salaam, Pwani na Tanga.

“Ilipoungua, tulilazimika kuagiza transfoma nyingine kubwa zaidi yenye megawati 240. Ilishakuja na kazi ya kuifunga inaendelea vizuri. Tunatarajia itakamilika kabla ya katikati ya mwezi ujao,” alieleza Waziri.

Akifafanua zaidi, Waziri Kalemani alisema kuwa, transfoma hiyo ikishafungwa, itaimarisha hali ya upatikanaji umeme maeneo mbalimbali ya Dar es Salaam, Chalinze na Tanga. Aliwaomba wananchi wavute subirá ili kazi hiyo ikamilike na kuahidi kuwa changamoto hiyo itakwisha.

Awali, wakizungumza kwa nyakati tofauti, mbele ya Waziri Kalemani, viongozi wa Serikali na kisiasa akiwemo Mkuu wa Wilaya na Mbunge wa Jimbo la Korogwe Mary Chatanda, waliipongeza Serikali kwa kazi nzuri ya kupeleka umeme kwa wananchi lakini wakasema changamoto waliyonayo ni suala la kukatika-katika kwa umeme.

Katika hatua nyingine, Waziri aliwahimiza watendaji wa Shirika la Umeme Tanzania (TANESCO), kutoa elimu kwa wananchi vijijini na kuwahamasisha wajitokeze kulipia shilingi 27,000 kwa ajili ya kuunganishiwa umeme badala ya kusubiri hadi waone nguzo katika maeneo yao.

“Asilimia kubwa ya wananchi wanaodai hawajaunganishiwa umeme, ukifuatilia unabaini sababu ni kwamba hawajalipia. Inawezekana hawana elimu juu ya suala hili hivyo TANESCO waelimisheni wananchi walipie, kisha ndipo wadai umeme.”

Vilevile, Waziri aliwaagiza Mameneja wa TANESCO nchi nzima kupokea malipo ya wateja wanaotaka kuunganishiwa umeme vijijini hata wale wanaolipa kwa kudunduliza.